Kryeparlamentarja Lindita Nikolla: Momenti i vështirë me Berishën, kur më thërriste “ndrikull”

Kryetarja e Kuvendit, Lindita Nikolla ka treguar një nga momentet më të sikletshme të saj, në kohën kur ishte ministre e Arsimit. Etiketimet e ish-kryeministrit Sali Berisha, në kohën kur e thërriste “ndrikull Nikolla”, i ka cilësuar si një moment të vështirë.

“Komunikimin e shoh si një pikë të fortë, nuk kam pengesa me askënd, as me Berishën, por sigurisht që një moment i vështirë komunikimi, ishte kur Berisha më thërriste “ndrikull”. Për fat të keq, lufta politike në Shqipëri përqendrohet në denigrime të figurës dhe personalitetit”, u shpreh Nikolla.

Ajo shton se askush nuk ka ndjerë nga Rama, sulme denigruese si ato të bëra nga ish-kryeministri Berisha.

Nga ana tjetër, Nikolla tha se nuk ka ditur asgjë, para shpalljes “non grata” të Sali Berishës, duke mohuar çdo aludim. Drejtuesja e Kuvendit, u ndal edhe në një ftesë të saj nga Lezha, kur nënvizoi se “Ftesa ime ishte që Sali Berisha të dilte në pension politik”.