Kryesia shqiptare e OSBE-së/Manastirliu: Gratë ulin konfliktet, hapa drejt barazisë gjinore

“Shqipërinë renditet në mes të vendeve europiane në indeksin e barazisë gjinore, por në fusha të caktuara, sikundër është parandalimi i konflikteve, diplomacia, etj, edhe pse janë bërë hapa përpara, ekzistojnë ende pabarazitë dhe diskriminimi gjinor, që pengojnë përpjekjet tona për krijimin e mundësive të barabarta për gratë, burrat, vajzat dhe djemtë”.

Ministrja e Shëndetësisë dhe Mbrojtjes Sociale, Ogerta Manastirliu në konferencën e organizuar sot nga OSBE dhe Ministria e Shëndetësisë, “Agjenda për Gratë, Paqen dhe Sigurinë”, në kuadër të aktiviteteve që Qeveria Shqiptare po zhvillon gjatë mbajtjes së Kryesisë së radhës së OSBE. Duke deklaruar se zhvillimi i demokracisë dhe sigurimi i paqes nuk mund të arrihen pa një përfshirje, përkushtim dhe punë të përbashkët të burrave dhe grave, Manastirliu tha se Shqipëria ka bërë përparime në drejtim të barazisë gjinore.

”Indeksi i barazisë Gjinore 2020 në Shqipëri” e rendit Shqipërinë të 17-n ndër 28 vendet e BE dhe 2 vende të Ballkanit Perëndimor në indeksin e barazisë gjinore, por zbutja e hendekut gjinor mbetet ende një sfidë, për të mos e konsideruar barazinë gjinore si një ëndërr e brezave që do vijnë, por si një mundësi të ta nisur ndryshimin sa më parë, për të përmbushur përtej kuotave dhe shifrave, barazinë mes burrave dhe grave, pa ndasitë e atyre që rëndom vijojnë të konsiderohen “punë burrash”, ku jemi ende larg qasjes tonë drejt barazisë gjinore”.

Gjatë fjalës së saj, Manastirliu tha se një tjetër tregues i rëndësishëm i përpjekjeve të qeverisë shqiptare drejt barazisë gjinore është edhe raporti i Indeksit Global të Hendekut Gjinor të Forumit Ekonomik Botëror të vitit 2020, i cili tregon se: Shqipëria aktualisht renditet në vendin e 20 nga 153 vende, krahasuar me vendin e 34-t që ishte në vitin 2018, me përmirësime të dukshme në pjesëmarrjen dhe përfaqësimin politik të grave.