Kthimi i ish-hotelit në strehë sociale, Gonxhja: 45 familje në Burrel përfitojnë strehim të ri e dinjitoz

Ministri i Ekonomisë, Kulturës dhe Inovacionit, Blendi Gonxhja thotë se 45 familje në Burrel do të kenë së shpejti një strehë të re dhe dinjitoze, falë adaptimit të ish-Hotelit të Uzinës së Ferrokromit në kuadër të Programit Kombëtar të Strehimit Social. Sipas tij, ky projekt është realizuar nga Ministria e Ekonomisë, Kulturës dhe Inovacionit në bashkëpunim me Bashkinë Mat.

“Përmes adaptimit të ish-Hotelit të Uzinës së Ferrokromit në Burrel, 45 familje përfituese së shpejti do të kenë një strehë të re dhe dinjitoze, falë Programit Kombëtar të Strehimit Social të Ministrisë së Ekonomisë, Kulturës dhe Inovacionit në bashkëpunim me Bashkinë Mat”, shkruan Gonxhja. Gjatë inspektimit, ministri nënvizoi se ky është një tjetër investim në ndihmë të banorëve që kanë probleme me strehimin.

”Pra është një projekt për strehimin social, por këtu jemi në një tjetër format, pasi objekti ka qenë ish-Hoteli i Uzinës së Ferrokromit në Burrel, i uzurpuar kohët më parë nga banorë të shtresave në nevojë, ndërsa objekti ishte i privatizuar nga një kontraktor. Së bashku me Ministrinë e Financave, Bashkia Burrel bëri të mundur blerjen e asetit me çmimet referuese dhe sot bëjmë të mundur rikonstruksionin e këtij objekti në një objekt banimi për familjet në nevojë ku do të strehojmë 45 familje dhe brenda 10 ditësh do të kenë strukturë akomoduese me të gjithë infrastrukturën e nevojshme për shtëpi banimi”,- përfundoi Gonxhja.