Kumbaro e revoltuar: Hedhja e mbeturinave në rrugë krim, do gjobiteni

Ministrja e Turizmit dhe Mjedisit Mirela Kumbaro ka ndarë në rrjetet sociale një video, përmes të cilës denoncon rastin e dy automjeteve në aksin Vlorë – Orikum, të cilat në mbrëmje hedhin mbetjet jashtë koshave.

E revoltuar, ministrja shkruan se veç se turp, hedhja e mbeturinave në rrugë përbën edhe krim mjedisor.

Ajo bën me dije se personat që kanë hedhur mbeturinat jashtë koshit janë gjobitur nga policia për shkeljen që kanë bërë.

“Turp e faqja e zezë po e po, por është edhe KRIM MJEDISOR! Ja ç’ndodhi në aksin nacional Vlorë-Orikum, ku dy makina private njëra pas tjetrës shkojnë natën si kusarë dhe hedhin mbeturinat jashtë kazanëve pavarësisht se kazanët janë bosh! Me të tilla raste përballen ekipet e pastrimit çdo ditë, nga individë e biznese, që publiken e shohin si tokë pa Zot dhe i hedhin kuturu plehrat, jashtë pragut të tyre

Por jo më! Faleminderit Policisë së Shtetit që bëri të mundur identifikimin, dhe Policisë Bashkiake që i gjobitën.

Te gjithë duhet të jemi në vëzhgim të rasteve të ngjashme”, shkruan Kumbaro.