”Kurti mos ti bëjë naze fuqive të mëdha”, Rama: Draftin nuk e çova te Putini, por tek dy njerëzit që i kanë bërë një dhuratë Kosovës

Kryeministri Edi Rama, thotë se Kosova nuk duhet t’i bëjë naze planit franko-gjerman, pasi marrëveshja e radhës që ndërkombëtarët do t’i propozojnë nuk do të jetë aq e mirë. Gjatë konferencës me gazetarët, Rama shtoi edhe se draftin e tij për Asociacionin e komunave serbe nuk e ka dërguar te Vladimir Putini, por te njerëzit që i kanë bërë Kosovës, siç tha ai, dhuratën më të madhe të mundshme.

“Nuk e kam çuar atë draft te Putini dhe te Xi Jingpini. E kam çuar atë draft te dy njerëzit që i kanë bërë gati Kosovën dhuratën më të madhe të mundshme: plani franko-gjerman është gjëja më e bukur që mund të shkruajnë politikanët dhe juristët së bashku. Kosova e ka në tavolinë atë plan.

Mua më ka mësuar jeta që kur i bën shumë naze një marrëveshjeje që ta vënë në tavolinë fuqitë e mëdha, marrëveshja tjetër nuk është më aq e mirë. Nëse kujtesa nuk më tradhton, fqinjëve tanë maqedonas iu vu dikur një marrëveshje që të pranonin që emri i vendit të mos ishte i njëjti brenda me jashtë. Nuk e pranuan. Tani e kanë të njëjtin brenda dhe jashtë”, tha Rama.