Ligji antiduhan, gjoba lokaleve që lejojnë konsumin në ambientet e jashtme të mbyllura

Ligji antiduhan është shtrirë në çdo lokal, i cili  ambientin e jashtëm ku lejohet konsumimi i tij e kanë shndërruar në të mbyllur. Inspektoriati Shtetëror i Shëndetit ka marrë masa administrative për këto subjekte, ndërsa përcakton qartë se ambienti i jashtëm duhet të jetë 50 % i hapur.

Ligji antiduhan ndalon konsumimin e tij në ambiente të mbyllura, por një pjesë e tyre i kanë shndërruar ambientet e jashtme në të mbyllura.

Për të gjitha këto, Inspektoriati Shtetëror Shëndetësor ka marrë masa.

Gjatë vitit 2018 janë marrë 193 masa administrative, ndërsa në 2019, 466 masa.

Drejtorja e Institutit Shtetëror Shëndetësor, Vjollca Braho, deklaron se gjobat nuk kanë munguar as në ditët e para të janarit.

Vjollca Braho: Gjatë 2019 janë marrë  466 masa administrative, gjatë vitit 2018 janë marrë 193 masa administrative.  Gjatë gjithë inspektimeve që kemi realizuar në 2019 janë që në ditët e ftohta ambientet e jashtme janë kthyer në ambiente të brendshme, duke i mbyllur me vetrata, xham, tenda.

Por kush konsiderohet një ambient i hapur dhe një i mbyllur?

Braho deklaron se të gjitha subjekteve u është dërguar përkufizimi i mjedisit, 50 për qind e të cilit duhet të jetë i hapur.

Vjollca Braho: Kjo është shkresa që i kemi dërguar të gjtiha subjekteve dhe i kemi pasqyruar se kush është ambient i mbyllur dhe kush është i hapur. Vetëm faqja e murit, tavani dhe dyshemeje,  të gjitha faqet e tjera duhet të jenë të hapura. Në progres raportin e KE për 2019 është shprehur që ligji antiduhan për mbrojtjen e shëndetit nga produktet e duhanit është realizuar tërësisht.

Ligji trajton njësoj si në rastin e cigareve konvencionale edhe përdorimin e cigares elektronike, asaj me ngrohje dhe shishas në ambiente të mbyllura.

/Ora News