Linja e re tensionit të mesëm 20 KV në Kamëz, përfitojnë 5 lagje

Në territorin e bashkisë Kamëz po zbatohet një tjetër projekt shumë i rëndësishëm siç është ai i furnizimit me energji të qytetarëve. Bëhet fjalë për fazën e dytë të projektit të rrjetit të tensionit të mesëm 20 kv. Kjo fazë e projektit përfshin lagjet 5, 6 dhe 7 Bathore dhe lagjet 4, 5 në Kamëz.
Zbatimi i projektit do të sjellë një ndikim të ndjeshëm në përmirësimin e furnizimit me energji elektrike të banorëve të zonës, duke ulur rrezikun që kanë kabinat dhe linjat e amortizuara të tensionit të mesëm dhe të ulët. Gatishmëria e të dyja palëve, Bashkia Kamëz dhe OSHEE, për bashkëpunim të gjerë dhe afatgjatë bëri të mundur që të ofrohet edhe ky shërbim për komunitetin e qytetit të Kamzës. Bazat e këtij projekti janë hedhur që dy vite më parë, punë e cila po shkon drejt përfundimit, duke bërë të mundur edhe një herë përfitimin e një investimi shumë të rëndësishëm jo vetëm për qytetarët, por edhe për bizneset që ushtrojnë aktivitetin e tyre në këtë zonë. Nga ana e Bashkisë qenë ngritur grupe pune të posaçme për zbatimin sa më korrekt dhe me cilësi të lartë të projektit të rrjetit të tensionit të mesëm. Serioziteti i treguar në këtë bashkëpunim, por edhe në bashkëpunime me institucione të tjera, ka bërë që Bashkia Kamëz të shihet dhe realisht të jetë një partner serioz për zbatimin e projekteve të shumta me interes të ndërsjellë institucional, por veçanërisht në ndihmë dhe në dobi të komunitetit të banorëve të qytetit të Kamzës.