Lojërat Mesdhetare 2026, Gonxhja: Shqipëria dhe Italia dakord për protokoll të ri bashkëpunimi në sport

Në kuadër të Lojërave XX Mesdhetare Taranto 2026, ministri i Kulturës, Blendi Gonxhja, zhvilloi një takim pune me ministrin italian të Sportit dhe Rinisë, Andrea Abodi, dhe ministrin për Turizmin, Gianmarco Mazzi.

Takimi u fokusua te forcimi i bashkëpunimit mes Shqipërisë dhe Italisë në fushën e sportit dhe rinisë, me theks te shkëmbimi i përvojave dhe zbatimi i projekteve konkrete.

Palët diskutuan për formimin e drejtuesve dhe specialistëve teknikë, zhvillimin e infrastrukturës sportive, si dhe kërkimin e aplikuar në shkencën dhe mjekësinë sportive. Një vëmendje e veçantë iu kushtua edhe luftës kundër dopingut.

Delegacioni shqiptar vlerësoi përvojën italiane në organizimin e aktiviteteve të mëdha sportive, përfshirë Lojërat Olimpike dhe Paralimpike Milano Cortina 2026 dhe Lojërat Mesdhetare të Tarantos.

Kjo eksperiencë pritet të shërbejë edhe për përgatitjet e Lojërave XXI Mesdhetare, që do të zhvillohen në Prishtinë dhe Durrës në vitin 2030.

Gjatë takimit u diskutua gjithashtu roli i sportit në shkolla dhe universitete si instrument për gjithëpërfshirjen dhe kohezionin social.

Në përfundim, Shqipëria dhe Italia ranë dakord që bashkëpunimi të formalizohet përmes një Protokolli Mirëkuptimi dhe Veprimi, i cili pritet të nënshkruhet brenda fundit të shtatorit dhe do të përcaktojë angazhimet konkrete të dy vendeve.