”Mafia e tokave në Spille”, kryebashkiaku i PDIU: I hapur për hetim

Prokuroria e Kavajës ka nisur procedimin penal ndaj 23 personave, të cilët janë të dyshuar si të përfshirë në tjetërsimin e pronave në bregdetin e Spillesë. Në këtë hetim të Prokurorisë që ka zgjatur disa muaj, është i përfshirë edhe kryetari i Bashkisë së Rrogozhinës Beqir Nuredini, i akuzuar për shpërdorim detyre. Gjykata e Kavajës vendosi dje për kreun e PDIU-së masën e sigurisë detyrim paraqitje dhe i bllokoi pasaportën duke i ndaluar daljen jashtë Shqipërisë.

Kryebashkiaku i Rrogozinës, Beqir Nuredini, ka reaguar pas vendimit të Gjykatës së Kavajës për ti bllokuar pasaportën. Në një reagim të tij në rrjetet sociale, ai thotë se mbështet hetimet e nisura nga organi i akuzës por nga ana tjetër distancohet nga akuzat e ngritura ndaj tij për abuzime me pronat në bregdet në zonën e Spillesë.

“Duke marrë shkas nga çështjet e ngritura nga Prokuroria, si Kryetar i Bashkisë Rrogozhinë, mbështes hetimet dhe vënien para përgjegjësisë së autorëve. Unë si Kryetar Bashkie Rrogozhinë, kam zbatur procedurën që parashikon ligji për përcelljen e praktikave për regjistrim fillestar të pronave, të aplikuara nga banorët e zonës. Distancohem nga çdo akuzë që është bërë. Nga hetimet e Prokurorisë jam njohur me disa dokumenta, të cilat ishin te falsifikuara. Për këto falsifikime unë kam bërë denoncim në organet përkatëse. Masa ‘Detyrim Parqitje’, e caktuar nga Gjykata, për mua ishte e papritur. Kjo për shkak se unë kam qënë gjithmonë i gatshëm gjatë hetimeve dhe kam vënë në dispozicjon të Prokurorisë çdo dokument dhe dëshmi që më është kërkuar. Gjithesi mbeten i hapur për çdo hetim”.

Nuredini nënvizon se falë ndërhyrjeve të bëra nga Bashkia Rrogozhinë, Plazhi i Spillesë është kthyer në një ndër destinacionet më të rëndësishme turistike në vend.

“Kjo vërtetohet edhe nga frekuentimi që është bërë nga qytetarët përgjatë 2017. Nga një rrënojë, Plazhi i Spillesë është kthyer ndër plazhet më të kërkuara nga shqiptarë dhe të huaj. Janë më shumë se 20 mijë pushues në vit, që frekuentojnë Plazhin e Spillesë, falë këtyre ndërhyrjeve të bëra në 2 vitet e fundit”.