Manjani: Askush nuk merret me varfërinë

Përmes një postimi në facebook, ish-ministri i Drejtësisë, Ylli Manjani, thotë se askush nuk merret me varfërinë. Sipas tij, ”sa më shumë të varfër të ketë në shoqëri aq më solid është pushteti, qeveria e të cilit nuk ka sesi të mos jetë arrogante dhe e pashpirt”.

”Nuk jam kundër pasurisë, as pasanikëve, përkundrazi. Detyra e çdo politike, pushteti e qeverie është të krijojë një shoqëri të drejtë, me shance të barabarta por edhe të kujdeset për dinjitetin njerëzor. Kjo detyrë deri më sot ka dështuar të realizohet”,-shkruan Manjani më tej.

Postimi i plotë

Varfëria është aleati më besnik i pushtetit por edhe shkatërrimtare e demokracisë. Pa asnjë dyshim! Sa më shumë të varfër të ketë në shoqëri aq më solid është pushteti, qeveria e të cilit nuk ka sesi të mos jetë arrogante dhe e pashpirt.

Varfëria i kushton shumë pak, thuajse asgjë pushtetit, sa çmimi i një vote. Ndërsa shoqërisë i kushton shumë, jashtë mase shumë. Prandaj askush nuk merret me varfërinë. Thjesht ripaketojnë të njëjtin mekanizëm që siguron pasurinë.

Nuk jam kundër pasurisë, as pasanikëve, përkundrazi. Detyra e çdo politike, pushteti e qeverie është të krijojë një shoqëri të drejtë, me shance të barabarta por edhe të kujdeset për dinjitetin njerëzor. Kjo detyrë deri më sot ka dështuar të realizohet.