Masakra në ish-Bllok, Elvana Gjata në polici: S’i njoh ata që u zunë me Ervinin

Këngëtarja Elvana Gjata, është ndaluar të shtunën e kaluar në Rinas dhe më pas u shoqërua në ambjentet e policisë së Tiranës, ku është marrë në pyetje. Për këngëtaren Gjata ishte lëshuar një urdhër ndalimi nga prokuroria e Tiranës, pasi nevojitej administrimi i dëshmisë së saj lidhur me çështjen penale që prokuroria ka regjistruar për masakrën e 4 tetorit 2018.

Elvana Gjata është njohur me urdhërin e shoqërimit me forcë të nxjerrë nga prokuroria dhe me vullnetin e saj, së bashku me policët e Rinasit, është shfaqur ditën e shtunë në ambjentet e policisë së Tiranës. Intervistimi i saj është bërë nga një oficer i Drejtorisë Vendore të Policisë së Tiranës, ku për gati 40 minuta Gjata është pyetur në cilësinë e deklarueses që kishte dijeni mbi rrethanat e ngjarjes, ku ndodhi vrasja e Fabian Gaxha dhe u plagosën dy persona të tjerë Ervis Martinaj dhe Elio Hato.

Këngëtarja ka deklaruar se nuk i njihte personat që u zunë me Ervin Matajn, të dashurin e saj.

Pas pyetjes së artistes ajo është lënë e lirë dhe njëherazi ka dalë nga kërkimi policor, pasi prokuroria nuk kishte kërkuar asnjë masë parandalimi ndaj saj, veç shoqërimit të detyrueshëm.