”Siç na u sekuestruan nga shteti, ashtu edhe duhet të na kthehen me një vullnet të gjerë politik”. Kështu shprehet arqipeshkëvi i Shkodër-Pult, Imzot Angelo Massafra, i pyetur mbi problematiken ende të pazgjidhur të pronave të komuniteteve fetare.
”Mungon vullneti politik për të zgjidhur problemet. Si kanë marrë vendimet për të na sekuestruar gjithçka ashtu edhe duhet të na kthehen. Kërkon angazhim më të madh nga klasa politike, për t’i dhënë Shqipërisë vendin që i takon në Ballkan dhe Europë”. Vendimmarrësve u bën apel për reflektim, sepse janë shpenzuar mjaft energji të kota. ”Të vënë dorën mbi zemër, për të gjitha ata që banojnë këtu në Shqipëri. Një pjesë e shqiptarëve janë të dekurajuar”.
Duke i bërë një retrospektivë 28 viteve të tij në Shqipëri kur për herë të parë erdhi në tokën mëmë në 1 dhjetorin e 1991, imzot Massafra pranon se vendi ka bërë shumë përparime, por nuk duhet mjaftuar me kaq. ”Kemi bërë hapa të mëdha në shoqëri, por duhet të ishte bërë më shumë”.
