Mbi 100 milionerë britanikë i kërkojnë kryeministrit të ri Andy Burnham të taksohen më shumë

Mbi 100 milionerë në Mbretërinë e Bashkuar i kanë bërë një thirrje të pazakontë kryeministrit të ri, Andy Burnham, duke kërkuar që të rriten taksat për më të pasurit. Përmes një letre publike të titulluar “Proud to Pay” (Krenarë që paguajmë), ata shprehen se janë të gatshëm të paguajnë më shumë, në mënyrë që vendi të investojë më shumë te qytetarët dhe shërbimet publike.

Në mesin e 120 firmëtarëve të letrës janë edhe ish-futbollisti dhe komentatori sportiv Gary Lineker, si dhe aktorja Julia Davis. Ata i drejtohen Burnham me mesazhin: “Si milionerë kemi një mesazh të qartë për ju, kryeministri ynë i ri: na taksoni. Jemi krenarë që paguajmë dhe jemi këtu për të qëndruar.”

Grupi, që e quan veten “Patriotic Millionaires” (Milionerët Patriotë), argumenton se pasuria dhe pushteti janë përqendruar prej kohësh në duart e një pakice, duke dëmtuar vendin, demokracinë dhe mjedisin. Sipas tyre, të ardhurat nga taksimi i pasurisë mund të përdoren për të ulur pabarazinë, për të përmirësuar infrastrukturën publike dhe për të mbështetur bizneset e vogla.

Gary Lineker deklaroi se njerëzit më të pasur mund të përballojnë të kontribuojnë më shumë, ndërsa shumë britanikë po hasin vështirësi për të përballuar koston e jetesës.

Nga ana tjetër, Sekretarja e Thesarit, Emma Reynolds, e mirëpriti nismën, por theksoi se çdo ndryshim i rëndësishëm në politikat fiskale do të shpallet vetëm në buxhetin e ardhshëm.

Edhe vetë Burnham ka lënë të kuptohet se qeveria e tij mund të kërkojë “pak më shumë” nga më të pasurit dhe nuk ka përjashtuar mundësinë e vendosjes së një takse mbi pasurinë.

Sipas një raporti të ekonomistëve Gabriel Zucman dhe Ben Tippet, një taksë minimale vjetore prej 2% për personat me pasuri mbi 100 milionë paund mund t’i sillte buxhetit britanik rreth 10 miliardë paund në vit. Ndërsa organizata “Patriotic Millionaires” vlerëson se një taksë 2% për pasurinë mbi 10 milionë paund do të siguronte rreth 24 miliardë paund në vit, ndërsa ndryshimet në taksën mbi fitimet kapitale do të gjeneronin edhe 12 miliardë paund të tjera.