Mbipopullim dhe ushqim i keq, kërkohet mbyllja e dy burgjeve

Kushtet në të cilin ndodhet burgu i Sarandës dhe ai i Burrelit ka vënë në lëvizje Avokatin e Popullit, i cili ka kërkuar mbylljen e menjëhershme të këtyre institucioneve. ”Rekomandim për mbylljen e menjëhershme të Institucionit të Ekzekutimit të Vendimeve Penale Sarandë, në vijim të rekomandimit me shkresë nr.K4/I88-2 prot, datë 28.12.2017”.

Po ashtu në mars të këtij viti, Avokati i Popullit ka kërkuar edhe mbylljen e burgut të Burrelit, me një numër të konsiderueshëm të dënuarish. Sipas dokumentit, rezulton se rekomandimi për mbylljen e këtij institucioni është përsëritur brenda dy viteve përfshirë vitet 2017-2019.

Në rekomandimet e Avokatit të Popullit, kërkohet përmirësim i kushteve të të dënuarve dhe paraburgosurve në Berat, 302 Mine Peza Tiranë, Vaqarr, Tepelenë, Shënkoll Lezhë, Tropojë dhe burgun e grave në Ali Dem. Prej vitesh mbipopullimi, kushtet higjeno-sanitare dhe ato të ushqimit kanë qenë ndër problemet e konstatuara në burgje, denoncuar edhe nga vetë të burgosurit ndërsa hapja e burgut më të ri në Rec të Shkodrës ka zbutur këtë situatë por pa dhënë zgjidhe përfundimtare.