Më pak para’ për të varfërit – 1.8 mld lekë më pak nga buxheti, më pak edhe se 2017

Në një raport të publikuar vetëm pak kohë më parë, Banka Botërore nënvizonte faktin se, Shqipëria është një prej vendeve me shpenzimet më të ulta për të varfërit në rajon. Mesatarja rajonale fiksohet në 250 milionë dollarë, ndërkohë që për 2018-ën, qeveria shqiptare projekton rreth 215 milionë dollarë shpenzime për shtresat në nevojë.

Por, po të shohim performancën buxhetore të 8  muajve të parë të vitit, vëmë re një rënie të ndjeshme të këtyre shpenzimeve. Rënia është jo vetëm në raport me atë çka planifikonte qeveria shqiptare në buxhetin e 2018-ës, por edhe në raport me buxhetin e vitit 2017. Kështu, në zërin shpenzime të tjera sociale, ku përfshihen pagesat ndaj papunësisë, ajo e ndihmës ekonomike e shpërblimi i familjeve në nevojë por edhe dëmshpërblimi për ish të përndjekurit, janë shpenzuar vetëm 13.3 miliardë lekë gjatë tetëmujorit të vitit.

Në të njëjtën periudhë të 2017-ës, shifra fiksohej në 14.5 miliardë lekë. Planifikimi ndërkohë fliste për 15.1 miliardë lekë, pra 1.8 miliardë lekë më shumë. Të dhënat tregojnë se pagesa ndaj shtresave në nevojë këtë vit do të bjerë në më pak se 1.4% të PBB. Mesatarja globale fiksohet në 1.5%, ndërkohë që ajo rajonale fiksohet në 2.2% të PBB, ç`ka tregon distancën e madhe me fqinjët.