Mediat e huaja: Vritet polici elitar, aty ku droga sillte 6.4 mld euro

Incidenti i rëndë mes forcave speciale te RENEA-s në Lazarat, ka tërhequr vëmendjen e medieve ndërkombëtare. Agjencitë më të mëdha si AFP, AP, apo Reuters kanë raportuar ngjarjen e sotme, së cilës i janë referuar më pas thuajse mediat më në të zë të Europës. “Fshati jugor i Shqipërisë ishte objekt i një bastisje masive gjatë vitit të kaluar, kur qeveria shqiptare goditi këtë zonë të njohur, për prodhimi masiv të kanabisit, – saktëson “Asosiated Press”, që jep edhe lajmin tragjik të vrasjes së një efektivi të policisë elitare shqiptare. AFP e Reuters e kanë përshkruar pothuajse njësoj këtë ngjarje.

Një përplasje më armë në fshatin e njohur shqiptar për prodhimin e marijuanës, la të vrarë një efektiv police, 31-vjeç, si dhe u plagosën dy të tjerë. Sipas të dhënave zyrtare të policisë, zjarri u hap nga një grup kriminal që ndodhej brenda një banese në Lazarat.   

Fshati i Lazaratit u bë i njohur në vitin 2014, edhe në arenën ndërkombëtare, pas aksionit pesëditor të policisë. Nga ky aksion i shkatërruan 102 tonë marijuanë ose 530 mijë bimë lëndësh narkotike, që vlerësohej me vlerën e tregut në rreth 6.4 miliardë euro. Kjo shumë është më shumë se sa 60 pë qind e tërë GDP vjetore të  Shqipërisë.

Pas atij aksioni, policia shkruajnë mediat e huaja, ka kryer edhe operacione të tjera, në fshat. Por  këtë të mërkurë teksa u ndalua një makinë që po kontrollohej për armë, u qëllua nga një banesë afër mbi forcat e policisë, duke lënë të vrarë një prej tyre dhe duke plagosur dy të tjerë. Forca të shumta policie, pas ngjarjes, kanë rrethuar tërë zonën për kapjen e autorëve.

“Trupa të shumta policie, ashtu edhe drejtori i Përgjithshëm i Policisë së Shtetit, Haki Çako, ndodhet (aktualisht) në Lazarat,” – thuhet në deklaratën e Policisë së Shtetit. Nuk jepen detaje të tjera mbi operacionin që po kryhet aktualisht mbi kapjen e autorëve.  Në operacionet e kaluar në Lazarat, saktësohet se përveçse janë shkatërruar sasi të mëdha droge, janë kapur 11 armë të rënda, me mijëra lëndë eksplozive, e fishekë, si dhe 10 granadë. U kontrolluan mbi 130 shtëpi dhe u arrestuan 11 persona.

Prodhimi i një sasie kaq të madhe lëndësh narkotike në Lazarat, në miliarda euro, sipas vlerësimit të fundit në vitin 2013, bazuar nga të dhënat e policisë financiare italiane, e vuri për një kohë të gjatë në vështirësi Shqipërinë, tashmë edhe si vend anëtar i NATO-s dhe që aspiron të anëtarësohen në BE.

Besohet se pas ndërhyrjes së kaluar të policisë, në Lazarat nuk kultivohen më lëndë narkotike, por  megjithatë rajoni mbetet problematik sa i përket shtetit ligjor. Shqipëria nga ana tjetër, në tërësi, ka ende shumë punë për të bërë, për ndërtimin e shtetit ligjor. Dyshohet se personi që qëlloi mbi policinë ku mbeti i vrarë Ibrahim Basha, 31-vjeç, dhe u plagosën dy të tjerë, nuk është kapur në kohë gjatë operacionit të një viti më parë, teksa ai ndodhej në fshat dhe ishte larguar në male.