Mediu takim me biznesmenë të rinj: Implementimi i taksës së sheshtë do të sjellë frymëmarrjen për ekonominë

Problemet ekonomike dhe vështirësia e bizneseve në këtë periudhë pandemie ishin në fokus të takimit që kreu i PR, Fatmir Mediu, zhvilloi me biznesmen të rinj.

Fatmir Mediu: Zhvillimi i biznesit është në mënyrë të padiskutueshme, rruga e vetme për të krijuar mundësitë për punësim dhe ndërtimin e një ekonomie familjare dhe një ekonomie kombëtare të qëndrueshme. Por pika e parë ku duhet të fillojmë ne, duhet të biem dakord të gjithë së bashku, është që të krijojmë një konstitucion normal në Shqipëri, sepse nuk e kemi. Ne kemi prishur sistemin kushtetues në vend, nuk kemi më sistem gjyqësor, nuk kemi më Parlament të përgjegjshëm dhe nuk kemi qeverisje të përgjegjshme.

Prandaj e para duhet të fillojë pikërisht në ndërtimin e një konstitucioni që tregon qartësisht se kush janë limitet e veprimit të qeverisë, për të vazhduar më tej, në gjykimin tim, në mënyrë të padiskutueshme me reforma rregullatore, të cilat garantojnë mundësinë për të bërë biznes, jashtë kontrollit të burokracisë, i cili sa më tepër kontroll, sa më e madhe të jetë qeveria, aq më tepër do të shtohet korrupsioni dhe aq më tepër do të jenë pamundësitë për të bërë biznes në Shqipëri

Mediu u shpreh se implementimi i taksës së sheshtë do të sjellë frymëmarrjen për ekonominë dhe bizneset e vendit.

Fatmir Mediu: Bashkë me Partinë Demokratike, ne më parë por edhe tani, kemi përcaktuar si qëndrimin tonë nga pikëpamja e politikës fiskale taksën e sheshtë. Pra të ketë një taksë të sheshtë 9%, e cila në gjykimin tonë, krijon dhe stimulon edhe të ardhura më të mëdha në Buxhetin e Shtetit, por këto të ardhura në Buxhetin e Shtetit, pastaj është një moment tjetër që do të ndihmojë të zhvillojë ekonominë, në mënyrën se si përdoren këto të ardhura.