Meidani: Për ministrat e Ramës, tani tregohen barcaleta

Ish-presidenti Rexhep Mejdani, që nuk ka qenë asnjëherë i kënaqur nga kjo qeveri, thotë se ministrat e saj kanë rezultate mediokre.

Kështu në një shkrim të tij të botuar sot tek 'Panorama', Meidani shkruan se për ministrat e Ramës tani kanë filluar edhe barcaletat.

“Por le të kthehemi te një histori humori, që ka filluar të qarkullojë edhe në Shqipëri. Sipas saj, një nga ministrat e kabinetit, të sulmuar dhe akuzuar publikisht, pas mjaft dështimesh, në vend të dorëheqjes, u këshillua të shkonte për vizitë te doktori dhe të bënte një skanim të trurit, duke dyshuar për depresion. Pas skanimit, doktori, duke lexuar pamjet e përftuara, i tha ministrit: “Z. ministër, kam dy lajme të hidhura për ju: Së pari, sipas skanimit, unë shoh se truri juaj ka dy anë, anën e majtë dhe anën e djathtë”. Ministri, i çuditur nga ky pohim, menjëherë e ndërpreu doktorin: “A nuk është kjo normale, doktor? Unë gjithmonë kam menduar se çdo tru ka dy anë!”… “Pa dyshim”,­ u përgjigj doktori­ “Por truri juaj është krejt i pazakontë, sepse në anën e majtë, unë nuk gjej asgjë normale, aty nuk ka asgjë të rregullt. Ndërsa, në anën e djathtë, nuk shoh asgjë, nuk ka pasur apo, ndoshta, nuk ka mbetur më asgjë”…”, shkruan Meidani.