Meta për raportin e DASH: Të inkriminuarit të dalin para drejtësisë

Kryetari i Kuvendit, Ilir Meta, reagoi pas publikimit të raportit të Departamentit të Shtetit për trafikun e qenieve njerëzore. Në raport thuhet se një deputet ka qenë i dënuar për trafik qeniesh njerëzore. Në reagimin e tij, Meta kërkon që të gjithë të inkriminuarit të dalin përpara drejtësisë. Madje specifikon se të gjitha ata që kanë përfituar në të kaluarën, apo përfitojnë tani, duhet të ndëshkohen.

“Z. Meta shpreh bindjen se Raporti përfaqëson një platformë të rëndësishme dhe nxitje pozitive për punën e strukturave të specializuara të shtetit që përballen me këtë fenomen, në zbatimin e plotë të ligjit, zhvillimin e programeve sociale për parandalimin, mbrojtjen dhe rehabilitimit të viktimave të trafikut, parandalimin e shfaqes së tij, si dhe goditjen dhe ndëshkimin ligjor dhe pa asnjë kompromis të të gjithë të inkriminuarve që kanë përfituar apo tentojnë të përfitojnë nga kjo veprimtari kriminale”,- thuhet në reagimin e kreut të Kuvendit.

Njëkohësisht, Meta apelon dhe kërkon nga të gjitha strukturat e zbatimit të ligjit që në bashkëpunim të ngushtë me partnerët tanë ndërkombëtarë, të rrisin nivelin e profesionalizmit dhe të luftojnë pa asnjë kompromis, si dhe të çojnë përpara drejtësisë të gjithë të inkriminuarit e përfshirë në veprimtari të paligjshme të trafiqeve të çdo lloji.

“Meta gjithashtu vlerëson se lufta e pandërprerë ndaj krimit dhe korrupsionit është një sfidë e rëndësishme që kërkon modernizimin e shtetit, përkushtim, profesionalizëm, transparencë dhe mbështet procesin e dekriminalizimit përmes rritjes së standardeve ligjore për të gjithë përfaqësuesit publik të zgjedhur apo të emëruar,”- thuhet në deklaratën e Kuvendit.