Mijëra protestues nga më shumë se 200 organizata dhe shoqat pritet të marshojnë për klimën, pak javë para zgjedhjeve

Rreth 10 mijë persona pritet të marrin pjesë sot në një protestë të madhe për klimën në Stokholm, në një kohë kur Suedia ndodhet vetëm pak javë larg zgjedhjeve parlamentare.

Demonstrata organizohet nga më shumë se 200 organizata dhe shoqata dhe synon të ushtrojë presion ndaj qeverisë për forcimin e politikave për reduktimin e emetimeve.

Qeveria e kryeministrit Ulf Kristersson, e cila ka ardhur në pushtet në vitin 2022 dhe mbështetet nga partia populiste Demokratët Suedezë është përballur me kritika për politikat e saj klimatike.

Administrata ka ulur taksat mbi karburantet dhe ka reduktuar kërkesat për furnizuesit e benzinës dhe naftës për të përfshirë alternativa me emetime të ulëta karboni.

Ekspertë në Suedi dhe jashtë saj kanë paralajmëruar se këto politika mund të rrezikojnë objektivat e vendit për reduktimin e emetimeve.

Suedia synon të ulë me 70 për qind emetimet e CO2 nga transporti deri në vitin 2030, krahasuar me nivelet e vitit 2010, ndërsa objektivi afatgjatë është arritja e emetimeve neto zero deri në vitin 2045.

Qeveria ka refuzuar disa rekomandime të një komisioni të ngritur prej saj për mënyrën e arritjes së objektivit të vitit 2030.

Ndër propozimet ishte edhe heqja graduale e lëndëve djegëse fosile përmes rritjes së taksave mbi benzinën dhe naftën.

Qeveria argumenton se tranzicioni duhet të jetë gradual për të mbrojtur dhe forcuar konkurrueshmërinë e ekonomisë suedeze dhe kompanive të vendit.

“Kriza klimatike është shumë reale dhe është këtu”, deklaroi Beatrice Rindevall, drejtuesja e Shoqatës Suedeze për Ruajtjen e Natyrës, një nga organizatoret e protestës.

Ajo bëri thirrje për një politikë klimatike që të reduktojë emetimet menjëherë, duke iu referuar edhe valëve shkatërruese të të nxehtit që kanë goditur Evropën gjatë kësaj vere.

Protesta do të bashkojë studiues, të rinj, sindikata, organizata sportive, shoqata të zonave rurale dhe të natyrës, komunitete fetare dhe organizata për të drejtat e njeriut.

Organizatorët thonë se pjesëmarrja e më shumë se 200 organizatave është e paprecedentë për një demonstratë klimatike në Suedi.

Çështja e klimës pritet të ketë peshë të rëndësishme në zgjedhjet parlamentare të 13 shtatorit. /Ad.Ab./