Ministri Beqaj në audiencë me Senatin Italian

Ministri i Shëndetësisë, z. Ilir Beqaj, u prit më 28/10/2014 në selinë e Parlamentit Italian në takime pune me Presidenten e Komisionit të Përhershëm të Higjenës dhe Shëndetësisë, znj. Emilia Grazia De Biasi dhe Senatoren znj. Laura Bianconi, anëtare e Komisionit të Perhershëm të Higjenës dhe Shëndetësisë.

Në këtë takim, z. Beqaj vlerësoi zhvillimet e deritanishme të bashkëpunimit mes Italisë dhe Shqipërisë, ku asistenca nëpërmjet projekteve të Kooperacionit Italian është padyshim një ndihmë e konsiderueshme për shëndetësinë shqiptare.

Më tej, ministri Beqaj u ftua nga Presidentja De Biasi për të folur përpara anëtarëve të Komisionit të Perhershëm të Higjenës dhe Shëndetësisë, rreth situatës aktuale të sistemi shëndetësor shqiptar. Në fjalën e tij përpara komisionit të senatit, kreu i shëndetësisë shqiptare parashtroi synimet e Qeverisë Shqiptare për shndërrimin e sistemit shëndetësor drejt një sistemi të mbulimit universal dhe parashtroi hapat e rëndësishëm që janë ndërmarrë deri më sot për reformimin e sistemit shëndetësor, si dhe sfidat me të cilat ndeshet aktualisht ky sistem.

Ministri Beqaj theksoi në fjalën e tij, se sistemi i kujdesit shëndetësor përballet me dy sfida kryesore: së pari, përmirësimin e kujdesit shëndetësor për pacientët shqiptarë, jo vetëm në cilësi, por edhe përsa i përket problemit themelor të këtij sistemi në vend, ku më shumë se gjysma e shpenzimeve për kujdes shëndetësor, qytetarët e krijojnë nga xhepi i tyre, çka krijon një barrë shumë të madhe për ta dhe që padyshim, këtë barrë e ndjejnë shumë më të rëndë, ata që janë më të varfër apo njerëz që në rast sëmundje, rrezikojnë të bien në varfëri.

Pra, kjo ëshët sfida e zgjerimit të mbulimit me kujdes shëndetësor, por edhe ajo e zgjerimit të aksesit ndaj këtij mbulimi, duke kapërcyer barrierat financiare, gjeografike e kulturore për akses në shëndetësi.

Së dyti, për fat të keq, sistemi i kujdesit publik shëndetësor në vend, së bashku me drejtësinë, perceptohet si një nga sektorët më të korruptuar. Që do të thotë, në punën e përditshme, për të përmirësuar kujdesin, sfida jonë është që ta përmbysim këtë perceptim, duke zvogëluar maksimalisht korrupsionin në shëndetësi në të gjithë kapilaritetin e tij.

Kështu, duke përmirësuar kujdesin shëndetësor dhe duke ulur shkallën e korrupsionit, do të mund të rifitojmë besimin e qytetarëve shqiptarë tek e mira publike, – tha ai.