Ministri Vengu në Mynih: Ballkani Perëndimor është pjesë e sistemit nervor të sigurisë europiane

Ministri i Mbrojtjes, Pirro Vengu thotë se Ballkani Perëndimor është një komponent thelbësor i arkitekturës së sigurisë së Evropës. “Rajoni ynë nuk është periferia e sigurisë evropiane, por pjesë e sistemit të saj nervor”,-deklaroi ai, duke paralajmëruar për kërcënimet hibride, sulmet kibernetike dhe dezinformimin që synojnë dobësimin e institucioneve dhe fragmentimin e shoqërive.

Vengu nënvizoi se Shqipëria është plotësisht e linjëzuar me politikën e jashtme dhe të sigurisë së Bashkimi Evropian dhe kontribuon aktivisht në misionet e NATO dhe ato të udhëhequra nga BE-ja. Sa i përket instrumentit SAFE (Security Action for Europe), një nismë 150 miliardë euro e BE-së për investime në industrinë e mbrojtjes, ai theksoi se Shqipëria mbetet jashtë këtij financimi, ndonëse bashkëpunon ngushtë me Agjencia Evropiane e Mbrojtjes dhe përfiton nga Mekanizmi Evropian i Paqes.

Ministri theksoi gjithashtu se anëtarësimi i Shqipërisë në BE deri në vitin 2030 do të forconte më tej profilin e saj të mbrojtjes dhe do të rriste koherencën gjeopolitike të vetë BE-së. “Para më shumë se një viti, ne nënshkruam një Partneritet të ri për Sigurinë dhe Mbrojtjen me BE-në. Ne punojmë ngushtë me Agjencinë Evropiane të Mbrojtjes. Përfitojmë nga Mekanizmi Evropian i Paqes. Megjithatë, mbetemi jashtë financimit SAFE. Është e rëndësishme të kuptohet se për aleatë më modestë, nevojiten mekanizma financimi afatgjatë për të konkretizuar projekte të përbashkëta, si dhe për të integruar industrinë tonë të mbrojtjes në zinxhirin evropian të furnizimit,” tha ai.

Duke folur për mësimet nga lufta në Ukrainë, ai nënvizoi rëndësinë e shpejtësisë, kapaciteteve prodhuese dhe zinxhirëve të furnizimit, si dhe domosdoshmërinë e qëndrueshmërisë kombëtare. Shqipëria, sipas tij, po ringjall industrinë vendase të mbrojtjes dhe po bashkëpunon me kompani lider si Lockheed Martin, Elbit Systems, Thales Group, Heckler & Koch dhe Saab AB, ndërsa janë në negociata edhe me Leonardo S.p.A. dhe Fincantieri për ndërmarrje të përbashkëta.