Ministrja Koçiu nga Kukësi: Me buxhetin e 2024-ës, do të vijojmë investimet në pajisje mjekësore

Ministrja e Shëndetësisë dhe e Mbrojtjes Sociale, Albana Koçiu zhvilloi sot një vizitë në Spitalin Rajonal të Kukësit, ku pa nga afër investimin e rëndësishëm për rikonstruksionin e këtij spitali.

Krahas tjetërsimit të godinës, Koçiu është ndalur edhe në rëndësinë e aparaturës së re të densitometrisë kockore që ka rritur kapacitetet diagnostikuese, por edhe pajisjet e tjera që do të shtohen me buxhetin e vitit 2024.

“Qeveria shqiptare dhe Ministria e Shëndetësisë dhe e Mbrojtjes Sociale në buxhetin e vitit 2024 do të vijojë me investime në pajisje mjekësore të teknologjisë së lartë në kuadër të fuqizimit dhe modernizimit të diagnostikës në spitalet publike. Investimet dhe ndërhyrjet e rëndësishme në spitalet publike të vendit, për trajtimet e patologjive të ndryshme do të përmirësojnë jo vetëm nivelin diagnostikues, por pacientët do të marrin shërbime cilësore e sa më pranë vendbanimit të tyre”, u shpreh Koçiu.

Koçiu foli edhe për rëndësinë e aparaturës së re që ka lehtësuar shërbimin ndaj pacientëve. “Bashkë me mjekët e Spitalit Rajonal të Kukësit, krahas investimit të rëndësishëm që po kryejmë në rikonstruksionin e plotë të këtij spitali, vënia në shërbim të aparaturës së re të densitometrisë kockore ka rritur kapacitetet diagnostikuese”, tha ministrja Koçiu.