Monika Kryemadhi dorëzon dosjet tek misioni i ODIHR-it, me shkeljet e qeverisë për 25 prillin

Partia Demokratike dhe Lëvizja Socialiste për Integrim, kanë deklaruar se nuk i njohin zgjedhjet parlamentare të 25 prillit, ku akuzojnë kryeministrin Edi Rama dhe qeverinë për vjedhje dhe manipulim të votave.

Delegacioni i vëzhguesve të OSBE-ODIHR, zhvilloi mëngjesin e kësaj të mërkure, një takim me kryetaren e Lëvizjes Socialiste për Integrim, Monika Kryemadhi, në selinë e partisë.

Siç shihet edhe në foto, Kryemadhi i ka dorëzuar kryesueses së OSBE-së, dy dosje me shkeljet gjatë procesit zgjedhor të zhvilluar më 25 prill. Opozita i ka dorëzuar edhe një kërkesë Komisionit Qendror të Zgjedhjeve, për të marrë në dorë pamjet filmike të procesit zgjedhor.

Nga ana e tyre, OSBE-ODIHR ka dhënë një “koment” paraprak lidhur me zgjedhjet parlamentare, ku vunë theksin mbi vjedhjen e votave dhe ndikimin e administratës në proces, ndërsa raporti final pritet që të dorëzohet më 28 maj.