Mori hakun e vëllait, 31-vjeçari: Krimin e kreva pa e menduar. E pashë dhe e vrava

Habib Rexha pasi u dorëzua në Polici, ka dëshmuar se ditën e ngjarjes ka qenë rastësisht në të njëjtën zonë me Arjan Gosën në Kavajë, dhe se në makinë ka qenë me një shokun e tij, i cili nuk ka qenë në dijeni të situatës. Rexha ka deklaruar se i ka kërkuar mikut të tij të parkonte pak metra larg lokalit dhe ka shkuar e ka qëlluar me pistoletë Arian Gosën.

“Krimin e kreva pa e menduar, e pashë dhe e vrava”, ka thënë ai. Më pas Rexha rrëfen se i ka kërkuar mikut të tij që të largohen dhe miku i tij e ka lënë diku në dalje të Kavajës. Dyshohet se autori ka qëndruar në Kukës këto 2 ditë.

“Isha përballë kafenesë, në një kancelari, kur kam parë Arian Gosën në kafene me babain e tij. U largova 300-400 metra, parkova makinën dhe u nisa në drejtim të lokalit në këmbë. Nuk isha duke e ruajtur.

E pashë rastësisht dhe veprova nga gjaknxehtësia. Në makinë isha me një shokun tim. Dhe po me shokun jam larguar në fillim drejt Durrësit e më pas në Kukës. Vendosa të vetëdorëzohesha me kërkesë të babait tim në bashkëpunim me policinë”, ka deklaruar ai.