Moslinjëzimi i Shqipërisë me deklaratën e BE për Kosovën, Rama tregon pse u mor ky vendim

Kryeministri, Edi Rama, gjatë fjalës së tij në Kuvend, ka folur edhe për moslinjëzimin e Shqipërisë, për herë të parë me deklaratën e BE-së në lidhje me Dialogun Kosovë-Serbi, të datës 19 shtator 2023.

Rama thotë se kishin kërkuar një deklaratë të dytë për dënimin e organizatorëve të sulmit kriminal në veri, si edhe dënimin e zisë kombëtare, mirëpo kreu i qeverisë theksoi se BE u kishte shpjeguar se sipas procedurave nuk mund të dilnin me një deklaratë tjetër aq shpejt.

“Ngjarja më e rëndë në marrëdhëniet Kosovë serbi qysh pas vitit 1999. Ende më keq, ngjarja kriminale ishte pasuar nga një veprim i papranueshëm zyrtar. Shpallje zie në Beograd. Prandaj ua bëmë të qartë miqve se për tu linjëzuar me atë deklaratë që ishte krejt normale nëse agresioni s’do kishte ndodhur, prisnim një deklaratë të dytë të BE, ku do dënoheshin qoftë organizatorët e agresionit kriminal, qoftë organizatorët e zisë kombëtare në Beograd dhe të kërkohej fillimi i menjëhershëm i një hetimi ndërkombëtar. Na shpjeguan që kohën dhe procedurat e BE nuk e mundësonin dot një deklaratë të dytë, sipas nesh e domosdoshme në të njëjtën kohë me të parën. Dua ta bëj të qartë se moslinjëzim ne politikën e jashtme të BE nuk është fjalë goje për një vend kandidat që synon anëtarësimin në BE dhe që përgatitet të nisë me një prej pjesëve të negociatave që lidhet pikërisht me politiken e jashtme. Nuk është as një akt heroizmi, por mbetet një akt politike, kundërshtie në dokumentet tona me Brukselin”, tha Rama.