Ndarje e re administrative? Fino: Nëse PD pranon 4 rajonet

Reforma territoriale nuk ka dështuar, thotë Bashkim Fino, duke sfumuar indirekt edhe Reformën në Drejtësi. ”Unë mendoj se kjo ishte reforma më historike dhe më e mirë që është bërë për shqiptarët këto vitet e fundit. Është një reformë që do t’i rezistojë kohës”,-tha në ”A2cnn”.

Kur vjen fjala te menaxhimi i territorit, Fino mendon se duhet të ndiqet praktika e brendshme e socialistëve, të ndarjes në 4 rajone. Kalimi nga qarku në rajone, kërkon ndërhyrje në Kushtetutë, pra 94 vota. Mazhoranca ka treguar në disa raste se këtë numër kartonësh e ka tejkaluar falë opozitarëve të rinj. Çfarë e pengon ta ndërmarrë këtë nismë?

”Nuk mendoj se duhet marrë ndonjë nismë në këto momente dhe ne nuk kemi ndonjë nxitim për të bërë pa qenë edhe opozita. Edhe atëherë, kjo reformë e ka marrë aprovimin e opozitës në mënyrë indirekte për të bërë reformën territoriale”. Nga ana tjetër, Fino i thotë Bashës, se nëse kërkon rishikim të bashkive kjo do të shkojë krah për krah me idenë e rajoneve. ”Unë do t’i thosha Bashës të na tregojë dështimin e reformës, të na tregojë dështimin e të gjitha bashkive”.