Ndërhyrjet në TIMS, SHBA i ofron Ballës ndihmë për hetimin

Për ndërhyrjet e raportuara në sistemin TIMS të Policisë së Shtetit, Shtetet e Bashkuara të Amerikës janë të shqetësuara. Ambasada amerikane në Tiranë, bëri me dije takimin e të ngarkuarit me punë Martin McDowell me Ministrin e Brendshëm Taulant Balla. SHBA është në pritje të një hetimi të shpejtë.

”I ngarkuari me punë McDowell vuri në dukje shqetësimet e SHBA në lidhje me ndërhyrjen e raportuar në sistemet TIMS në Policinë e Shtetit. Ai nxiti një hetim të shpejtë dhe të gjithanshëm dhe theksoi rëndësinë që ka mbrojtja e të dhënave vetjake/sensitive, përfshi edhe të qytetarëve amerikanë në Shqipëri”.

Balla theksoi se vetëpastrimi i Policisë së Shtetit është një proces, i cili sapo ka hyrë në një fazë të re dhe që do t’i shkohet deri në fund. Sipas ministrit, forcimi i bashkëpunimit mes agjencive ligjzbatuese dhe lufta e përbashkët për spastrimin e vatrave të krimit do ta çojë Shqipërinë në një tjetër nivel të sundimit të ligjit.

Më herët Partia Demokratike, nëpërmjet Flamur Nokës ka akuzuar kryeministrin Rama dhe ministrin e Brendshëm Balla se me urdhër të tyre janë eksportuar të gjitha të dhënat e sistemit Tims në Qipro. Sipas Nokës, ky veprim është kryer me qëllimin e vetëm që pushtetarët të prishin provat që i implikon ata në takimet me elemente të krimit të organizuar.