Ndezën zjarre në toka dhe zona të mbrojtura, 2 në pranga, 2 të tjerë procedohen penalisht

Dy persona janë arrestuar nga Policia e Fierit, pasi dyshohen se kanë shkaktuar zjarre në zona të ndryshme, ndërsa dy të tjerë janë proceduar penalisht për të njëjtën vepër.

Në fshatin Eskaj të Lushnjës, Policia arrestoi shtetasin K. B., 60 vjeç, i cili u konstatua duke ndezur qëllimisht zjarr në një tokë që e kishte marrë me qira.

Ndërkohë, në zonën e mbrojtur Divjakë-Karavasta, në fshatin Hasturkas, u arrestua shtetasi E. S., 25 vjeç, banues në Fier. Ai dyshohet se ka shkaktuar zjarrin në grykëderdhjen e lumit Seman, ku flakët përfshinë bimësi dhe një sipërfaqe të konsiderueshme të pyllëzuar, pjesë e zonës së mbrojtur.

Në një tjetër rast, për shkak të moshës, Policia ka proceduar penalisht dy shtetas, 71 dhe 77 vjeç. Ata dyshohen se kanë ndezur zjarre në tokat e tyre, përkatësisht në fshatin Varibop të Fierit dhe në fshatin Çërrilë të Mallakastrës.

Sipas Policisë, për shkak të erës së fortë, zjarret kanë dalë jashtë kontrollit dhe janë përhapur në sipërfaqe me bimësi.

Materialet procedurale i janë referuar Prokurorisë së Fierit për veprën penale “Shkatërrimi i pronës me zjarr”.

Drejtoria Vendore e Policisë Fier u bën apel qytetarëve që të tregojnë kujdes maksimal dhe të shmangin çdo veprim që mund të shkaktojë zjarre, pasi pasojat mund të jenë të rënda për jetën e njerëzve, pronën dhe mjedisin.

Në mënyrë të veçantë, Policia u kërkon banorëve të mos djegin mbetje bujqësore dhe të mos përdorin zjarrin për pastrimin e tokave apo territoreve, pasi flakët mund të përhapen me shpejtësi dhe autorët do të përballen me përgjegjësi ligjore.