Ndryshimet në ligjet fiskale për uljen e informalitetit dhe evazionit fiskal, Denaj: Ja si do të tatohen të dy punësuarit

Gjate seancës së sotme plenare të Kuvendit të Shqipërisë, e cila nisi me një minutë heshtje për viktimat e tërmetit, kryetari i Kuvendit Gramoz Ruçi u shpreh se ka ardhur koha për një veting të thellë për të verifikuar kualifikimet, aftësitë, agjencitë, procedurat, rregulloret, licencimet dhe lejet për të ndërtuar. E ndërsa i bëri apel opozitës jashtë parlamentare që të bashkohet përballë kësaj fatkeqësie, ai tha se u ka kërkuar të gjithë homologëve të tij europiane, por edhe nga SHBA deri në Japoni mbështetje financiare për të rindërtuar zonat e prekura nga tërmeti.

Ndërkaq Ministrja e Ekonomisë dhe Financave, Anila Denaj ka deklaruar se nuk do të krijohet një paketë e mirëfilltë fiskale por do ketë ndërhyrje në disa ligje fiskale. Denaj tha se për të dy-punësuarit nuk do të ketë një tatim të ri por një tatim në vlerën totale, ndërsa do të përjashtohen nga taksat makinat historike.

“Nuk ka paketë të mirëfilltë fiskale por disa ndërhyrje në disa ligje fiskale. Ndryshimet janë për uljen e informalitetit dhe evazionit fiskal. Këtu synojmë të përshtatim ligjin me projektin e fiskalizimit. Po ashtu pjesë e paketës është edhe tatimi i të dy-punësuarve. Nuk është një tatim i ri por që do të tatojmë të dy punësuarit për vlerën totale të të ardhurave,” u shpreh ajo.

“Sa i takon fiskalizimit, ky projektligj është strategji për përafrimin e ligjit me atë të BE. Ky projekt bën që mbledhja e të ardhura të jetë eficent, si dhe monitorim në kohë reale”, tha Denaj.