Në Kishën Katolike në Berat, meshë për Nënë Terezën

Në ambientet e Institutit Katolik “Motrat Filipini” në Berat, u organizua sot një meshë e veçantë me rastin e Shenjtërimit të Nënë Terezës. Mesha u shoqërua më pas nga një ceremoni kulturore organizuar nga shkolla Katolike “Ylli i Mëngjesit” në bashkëpunim më Bashkinë Berat.

Të pranishëm në aktivitet ishin Impeshkvi Imzot Hil Kabashi, Kryetari i Bashkisë Berat Petrit Sinaj, motrat e Nënë Terezës nga Kisha Katolike në Elbasan, klerikë nga tre besimet fetare në qytet, autoritete lokale, qytetarë e shumë të rinj.

Gjatë Meshës së Shenjtë e ceremonisë u theksua roli i Nënë Terezës në ndihmë të njerëzimit, ofrimi i dashurisë dhe paqes për të gjithë njerëzit pa dallim feje dhe klase shoqërore, kthimi i buzëqeshjes për të pashpresët dhe njerezit në nevojë, energjia dhe përkushtimi ndaj të vuajturve.

Komuniteti Katolik në Berat megjithëse i vogël në numër, është shumë aktiv jo vetëm në orgazimet religjioze, por edhe ne aktivitete sociale dhe kulturore në qytet.

Qendra e Edukimit “Motrat Filipini” ofron mbështetje për fëmijët në nevojë, ata më aftësi speciale, si dhe qendra rinore dhe kurse edukative dhe rekreative për të rinjtë dhe fëmijët.