
Në prag të kremtimit të 100 vjetorit të themelimit të Kolegjit Universitar “Qiriazi”, në sallën “Charles R. Crane”, të këtij Kolegji në Kodër-Kamëz, u organizua ceremonia e dhënies së Medaljes “Mirënjohja e Përvjetorit të Artë”, z. Elmi Berisha, President i Federatës Panshqiptare “Vatra”, në SHBA.
“Medalja me motivacionin: “Në vlerësim të kontributit të Tij të çmuar dhe vlerat e treguara në drejtimin e Federatës Pan-Shqiptare në Shtetet e Bashkuara të Amerikës, “VATRA”. Personalitet i shquar, me vizione dhe rol të spikatur për forcimin e marrëdhënieve ndërmjet Shteteve të Bashkuara dhe Shqipërisë. Për konsolidimin e lidhjeve institucionale ndërmjet VATRA-së dhe Kolegjit Universitar “Qiriazi”, si vazhdimësi historike me ikonat e arsimit tonë kombëtar, Sevasti & Parashqevi Qiriazi dhe Kristo Dako, që janë trashëgimia e Kolegjit Universitar “Qiriazi”, por edhe pjesë e historisë së Federatës Pan-shqiptare “Vatra””, e akorduar nga Senati Akademik, iu dorëzua nga Presidenti i këtij Kolegji, Prof. Dr. Gjokë Uldedaj.
Në ceremoninë e dekorimit të z. Berisha, merrnin pjesë studentë dhe pedagogë të këtij universiteti. Të pranishëm ishin edhe Dr. Naim Dedushaj, drejtor i Rrjeteve të Bizneseve të Diasporës Shqiptare dhe Hazis Vardar, biznesmen, kryetar i Rrjetit të Bizneseve në Francë, të cilët shoqëronin kryetarin e “Vatrës” në turneun e Tij. Gjithashtu ishin të pranishëm edhe Robert Dako, nipi i Sevasti e Kristo Dakos dhe themelues i “Shkollës së Lartë Universitare Jopublike “Sevasti e Parashqevi Qiriazi”; Irfan Hysenbelliu, President i “Hysenbelliu Group”; Maksim Meço, rektor i Kolegjit Universitar “Qiriazi”; Kadri Morina, president i INSIG, biznesmen e humanist dhe shumë të tjerë.
- Berisha duke përshëndetur të pranishmit tha, se ndihet i nderuar që pikërisht nga Kolegji Universitar “Qiriazi” merr një vlerësim të tillë dhe se, dy institucionet tona, “Vatra” dhe “Kolegji Universitar Qiriazi”, mund të bëjnë më shumë për vlerësimin e figurave të trashëgimisë historike të Kolegjit Qiriazi, që janë njëkohësisht edhe emblema të Rilindjes dhe të arsimit kombëtar shqiptar. Përpara se të hapnin Institutin Femëror “Qiriazi” në Kodër-Kamëz, motrat Qiriazi dhe Kristo Dako, dhanë një kontribut të çmuar në organizimin e mësimit të gjuhës dhe të shkrimit shqip, në mesin e diasporës të Shteteve të Bashkuara.
Historia e “Vatrës” 110 vjeçare është e lidhur ngusht me historinë e Kolegjit “Qiriazi” 100 vjeçar. Kristo Dako, si një ndër drejtuesit dhe themeluesit e Vatrës dhe redaktor i organit të Vatranëve “Dielli”, është edhe ndër tre themeluesit e Institutit Qiriazi, bashkë me bashkëshorten e tij Sevasti Dako (Qiriazi) dhe Parashqevi Qiriazin. Të dy institucionet kanë histori unike: “Vatra”, një ndër shoqatat e shumta që u krijuan në periudhën e Rilindjes kombëtare (rreth 150 vetëm në territorin e Shteteve të Bashkuara), është e vetmja shoqatë që funksionon edhe sot, që ka një veprimtari të pandërprerë patriotike. Që ka punuar e punon pa reshtur për çështjen kombëtare, që lobon deri në kancelaritë më të fuqishme të botës për integrimin e Shqipërisë amë dhe të Kosovës në institucionet demokratike ndërkombëtare. Qysh në themelimin e saj, më 1912, rreth “Vatrës” u mblodhën burrat më të mençur e më të zotët që kishte Shqipërisa në diasporë. Puna e “vatranëve” ka qenë vendimtare në momentet kyçe që ka kaluar Shqipëria dhe kombi shqiptar. Fan Noli, Faik Konica, Kristo Dako, Kristo Floqi e dhjetra të tjerë rilindas, bashkuan përpjekjet e tyre për të garantuar paprekshmërinë e kufinjve të Shqipërisë fill pas shpalljes së Pavarësisë: nga Konferenca e Ambasadorëve në Londër e deri në Konferencën e Paqes në Paris, duke “zënë” miq të mëdhenj për t’u besuar fatin e vendit të tyre. Veprimtaria e “Vatrës” qe intensive edhe në lobimin e çështjes së Kosovës deri në shpalljen e pavarësisë së saj. Gjatë kësaj periudhe, Elmi Berisha, presidenti sotëm i “Vatrës”, ka qenë këshillari i njërit prej zëvëndëspresidentëve amerikan.
Kolegji Universitar “Qiriazi”, i vetmi universitet në Shqipëri që është i prejardhur prej stadeve të tjera të po këtij institucioni. I themeluar si “Shkolla e Vashave” në Korçë më 1891, përpara 131 viteve dhe i rihapur në Tiranë (Kodër-Kamëz), në vitin 1922, si “Institut Femrëror”, ai është unik në historinë e arsimit të lartë në Shqipëri. Duke u rikthyer në identitet pas vitit 1991, u themelua si “Shkollë e Lartë Universitare”, nga nipi i Sevasti e Kristo Dakos, Robert Dako, për të ardhur në këtë 100 vjetor në Tiranë, si “Kolegji Universitar Qiriazi” nën drejtimin e Prof. Gjokë Uldedaj.
Ky takim ceremonial, që nuk përbën “fletën” e parë e as të fundit, të bashkëpunimit e të respektit të ndërsjelltë midis dy institucioneve të moçme, na kujtoi “fillin” që lidh “Vatrën” me “Qiriazin”: Kristo Dako, i cili ka qenë pjesë e drejtimit të të dy institucioneve, por jo më pak edhe Sevasti Dako, që luajti një rol afrues midis faktorit shqiptar në diasporë dhe e motra Parashqevia, që përcolli mesazhe paqeje midis “Vatrës” dhe “Partisë Politike”, dy shoqata të shqiptarëve të Amerikës, që lobuan fort në Konferencën e Paqes në Paris. Ndërkohë Parashqevi Qiriazi qe e vetmja fermër si pjesëmarrëse në këtë Konferencë.
Dy “pasardhësit” e Kristo Dakos (gjykuar prej institucioneve që drejtojnë sot), Gjokë Uldedaj dhe Elmi Berisha, garantuan se “Kolegji Universitar Qiriazi” dhe “Vatra”, do të jenë gjithmonë e më tepër në krah të njëra-tjetrës, për përmbushjen e misionit të tyre dhe si kontributore në realizimin e projekteve të përbashkëta.

