Nesër nis shitja e teksteve shkollore

Nesër do të fillojë shitja e teksteve shkollore për vitin e ri që do të nisë në datë 12 shtator. Shitja ishte planifikuar që të niste në datë 25 gusht, por është shtyrë, pasi në tekstet shkollore mungonte pulla e Ministrisë së Arsimit dhe Sportit.

Por pas zgjidhjes së problemit të krijuar, nesër do të nisë shitja. Për nxënësit e klasës së parë tekstet shkollore do të kushtojnë 2300 lekë, ndërsa për të gjitha klasat e tjera çmimi është indeksuar me 2%.

Shoqata e Botuesve të Teksteve Shkollore njofton drejtorët e shkollave dhe mësuesit, prindërit dhe nxënësit  e qytetit të Tiranës se libraritë pranë shkollave janë furnizuar me tekstet shkollore të arsimit parauniversitar.

“Vendimi për furnizimin me tekste të librarive pranë shkollave është marrë për të shmangur problemet e krijuara viteve të kaluara, kur shitja e teksteve është bërë pa përdorimin e kasës fiskale. Në rast të mungesës së librarive, shitja do të bëhet në mjediset pranë shkollave nga persona të autorizuar.

U lutemi të gjithë prindërve dhe nxënësve që të fillojnë menjëherë blerjen e teksteve për të shmangur radhët e gjata në ditët e fundit para fillimit të vitit të ri shkollor’ thuhet në njoftimin e Shoqatës së Botuesve të Teksteve Shkollore.