Nga 291 kallëzime për 25 prillin, Gerti Shella: Veç gjysma u regjistruan nga SPAK-u

Qendra për Çështje të Informimit Publik, INFOÇIP shpalli rezultatet e raportit për hetimin e krimeve zgjedhore, si dhe shifrat e kallëzimeve që u depozituan në Prokuroritë e zakonshme dhe në SPAK në zgjedhjet për Kuvendin të mbajtura një vit më parë. Gerti Shella tha se janë gjithsej 291 kallëzime për krime zgjedhore, por rreth gjysma e tyre u regjistruan nga prokuroritë dhe SPAK-ut. Sipas tij është e paqartë arsyeja e fshirjes së këtyre kallëzimeve të bëra kryesisht nga PD, LSI, Presidenti dhe KQZ.

”Në muajin prill 2021 u dokumentuan nga ekipet monitoruese të INFOÇIP me faksimile 72 kallëzime për krime të dyshuara zgjedhore që iu dërguan specifikisht SPAK-ut kryesisht nga subjekti zgjedhor Partia Demokratike dhe më pak nga LSI dhe sigurisht 18 prej tyre duhet ti dërgoheshin për dijeni SPAK si sinjalizime më së shumti nga Presidenti i Republikës.

Në fillim të vitit 2022, ne u njohëm me raportin zyrtarë të institucionit për kriminalitetin dhe incidencën e krimeve të marra nën hetin nga SPAK, ku referoheshin 45 procedime penale në fushën e zgjedhjeve të mara nga ky institucion. Këto shifra siç e shikoni kanë lëvizur, ka një pikëpyetje pse kanë lëvizur. Në zgjedhjet e 25 prillit 2021 u depozituan në total dhe këtu kam parasysh 22 prokuroritë e rretheve, Spak-un, të paktën 291 njoftime ose kallëzime për vepra penale të dyshuara që cënojnë zgjedhjet demokratike.

Prej tyre 115 janë depozituar në Spak kurse 176 janë të depozituara në prokuroritë e rretheve. Në 6 raste është depozituar kallëzim për veprën penale të cilat ne fakt klasifikohen kunder personit, pra nuk janë krime zgjedhore, por që gjithsesi kanë sfond të pastër zgjedhor.

Një nga kallëzimet e bujshme që në fakt ka gjetur pasqyrim të konsiderueshëm dhe në media, çështja e patronazhistëve të cilat fillimisht u kallëzuan në SPAK nga dy subjekte si Presidenti i Republikës dhe subjekte të tjera zgjedhore por që për mungesë të kompetencës i ka kaluar prokurorive të zakonshme dhe në dijeninë tonë akoma nuk ka një rezultat për hetimin e këtij procesi”.