Ngricat lënë pa matësa Kukësin, Ujësjellësi s’ka lekë për zëvendësim

Aktualitet E Diel, 9 Maj 2021 12:36

Ndërmarrja e Ujësjellës Kanalizimeve në Kukës ka konstatuar se një pjesë e konsiderueshme e matësve të ujit në lidhjet me abonentët janë dëmtuar si pasojë e ngricës dhe temperaturave shumë të ulëta.Qindra aparate matës janë nxjerrë jashtë funksionit, të cilët duhet zëvendësohen, por Ndërmarrja e Ujësjellësit e ka të pamundur të bëjë zëvendësimin e tyre për shkak të pamundësisë financiare dhe borxheve të trashëguara.

Nisur nga kjo situatë emergjence, institucioni i Bashkisë i bën apel Drejtorisë së Përgjithshme të Ujësjellës Kanalizimeve dhe Ministrisë së Transporteve që të mundësojë rimbursimin e të gjitha defekteve dhe dëmtimit të matësve.

Gjatë ditëve të ftohta në qytetin e Kukësit janë shfaqur edhe probleme të ngrirjes së tubacioneve të Ujësjellësit në disa blloqe banimi ku është ndërhyrë nga grupet e avarive të ndërmarrjës se Ujesjellesit për shkrirjen e tyre.

Furnizimi me ujë të pijshëm vijon të jetë normal. Drejtoria e Ujësjellësit është në gadishmëri të plotë dhe ekipet e avarisë janë në terren për të siguruar furnizim të rregullt për qytetarët.