Ngrihet “super-agjencia” e shpronësimeve, Qeveria: Do veprojë edhe me kërkesa të privatëve

Kompetencat për shpronësimet do të kalojnë nga Ministria e Infrastrukturës dhe Energjisë tek një Agjenci e ngritur posaçërisht për këtë qëllim. Ministria e Infrastrukturës sapo ka hedhur për konsultim një projekt-akt me disa ndryshime në ligjin për shpronësimet. Aty argumentohet se ndryshimet e propozuara vijnë si domosdoshmëri për të përmirësuar procedurat e shpronësimit që vjen si rezultat i përvojës së deri tanishme me zbatimin  e  këtij ligji.

Gjatë punës në zbatim të këtij ligji, janë evidentuar nevoja për të saktësuar aspekte procedurale në fushën e shqyrtimit të kërkesave për shpronësim, duke i përqendruar kompetencat në një institucion të vetëm, theksohet në projekt-akt. Ajo që bie në sy në projektligj është se Agjencia Shtetërore e Shpronësimeve mund të vihet në lëvizje edhe me kërkesë të subjekteve private.

“Kur shpronësimi është kryer me kërkesën e një subjekti juridik privat, ministri qe  ka  në  varësi  Agjencinë  Shtetërore  për  Shpronësimin  (ASHSH),  i  kërkon ASHSH  që  mbi  kërkesën  paraprake  të  këtij  subjekti,  të  kërkojë  kalimin  e pronësisë  së  pasurive  të  shpronësuara  nga  shteti  në  favor  të  subjektit  privat  që ka  kërkuar  shpronësimin,  me  kushtin që  të  jetë  vërtetuar  sipas  ligjit  realizimi  i ndërtimit ose investimit për interes publik, për të cilin është kryer shpronësimi.”, thekson projektligji. /Scan