Nisma e Manastirliut për vizita e syze falas, përfitojnë banorët e Shtëpisë së të Moshuarve në Kavajë

Pas Shtëpisë së të Moshuarve në Tiranë, nisma e ndërmarrë nga Ministria e Shëndetësisë dhe Mbrojtjes Sociale për vizita të specializuara dhe syze falas vijoi në Shtëpinë e të Moshuarve në Kavajë.

58 të moshuar kryen vizitat e specializuara okulistike dhe 22 prej tyre u pajisën me syze të posaçme sipas nevojës.

Shërbimi i plotë okulistik falas, i cili ofrohet për herë të parë në institucionet rezidenciale publike për të moshuarit do të vijojë gjatë muajit Korrik në të gjitha Shtëpitë e të Moshuarve në vend.

Pak ditë më parë 50 banorët e Shtëpisë së të Moshuarve në Tiranë përfituan vizitat e specializuara dhe syze falas. Nisma e Ministres Manastirliu do të vijojë me të gjithë të moshuarit që banojnë në institucionet publike rezidenciale.