Një grua dhe një vajzë i japin fund jetës, vetëhelmohen në Durrës

Një grua dhe një vajzë 14-vjeçe i kanë dhënë fund jetës përmes vetëhelmimit.

Të dyja rastet janë shënuar në zonat periferike të Durrësit.

Gruaja, 36-vjeçe me inicialet V.Xh. nga fshati Rubjekë i Maminasit, banuese në Prezë është vetëhelmuar e për pasojë ka gjetur vdekjen në qendrën spitalore “Nënë Tereza” në Tiranë.

Paraprakisht deklarohet se gruaja ka qenë në gjendje depresive. Grupi hetimor po heton edhe mbi marrëdhëniet e saj bashkëshortore, apo probleme të tjera që mund ta kenë shtyrë drejt flijimit.

Vetëhelmimi tjetër është regjistruar në fshatin Katund i Ri. Një vajzë vetëm 14-vjeçe i ka dhënë fund jetës përmes konsumimit të një sasie fostoksine.

E mitura nuk ka lënë asnjë mesazh për aktin që mori, por nga hetimet paraprake, bazuar në dëshmitë e familjarëve, rezulton se vajza për shkak të një problemi shëndetësor, nga një ndërhyrje kirurgjike, ishte mbyllur shumë në vetvete kohët e fundit.

Familjarët e kanë çuar atë fillimisht në spitalin e Durrësit e më pas në Tiranë për ndihmë të specializuar, por e mitura nuk ka mundur të mbijetojë.