”Ose e imja ose e askujt”, vrasja e Klodiana Vefës e paralajmëruar

Klodiana Vefa që u vra në Itali nga bashkëshorti i saj, është një krim i paralajmëruar. Të paktën kështu raportojnë mediat italiane pas zbulimit të disa detajeve të reja. Martesa e Klodianës me bashkëshortin Alfred Vefa kishte marrë fund prej rreth 6 vitesh.

37-vjeçarja kishte një të dashur tjetër disa kohë më parë, ndërsa ky i fundit kishte takuar edhe Alfredin duke i kërkuar që t’i jepte fund lidhjes me Klodianën. Por bashkëshorti nuk e pranonte ndarjen. Sipas informacioneve të fundit, ai e kishte kërcënuar disa herë Klodianën, duke i thënë “po të numërohen ditët” dhe “do të jesh e imja ose e askujt”.

Grupi hetimor beson se për vrasjen nuk kishte një shkak konkret, por ka qenë situata e nderë e akumuluar prej kohësh mes çiftit çka detyroi Alfred Vefën të ekzekutonte me 3 plumba 37-vjeçaren, nënë e dy fëmijëve.

Mikesha të Vefës e kanë përshkruar bashkëshortin e saj si një njeri të dhunshëm. Trupi i pajetë i Klodiana Vefës u gjet nga fëmijët e saj. Alfred Vefa u arratis pas krimit. Ai vijon të jetë në kërkim nga policia italiane.