Pak ditë pas arrestimit, 45-vjeçari var veten në burgun e Peqinit

Astrit Pukameka u arrestua pak ditë më parë në Kavajë, pas një sherri që degradoi në plagosje me thikë, pengmarrje dhe më pasai kërcënoi se do të digjte një karburant. E gjithë ngjarja ishte si një skenë filmi. Por sot 45-vjeçari ka varur veten në ambientet e paraburgimit të burgut të Peqinit. Ai ka ndërruar jetë në spitalin e Peqinit pasi i është dhënë ndihma e parë nga mjekët.

45-vjeçari pati një sherr me një kushërir të ish-bashkëshortes së tij, Bardhyl Petja të cilin e plagosi me thikë. Nën kërcënimin e thikës, 45-vjeçari ka hipur në një taksi ku i ka kërkuar drejtuesit të mjetit ta largojë sa më shpejt nga aty. Më pas ai i ka kërkuar ta ndalojë në një pikë karburanti në Kavajë dhe pasi ka ndaluar, ka plagosur me thikë taksistin Arjan Shau.

Më pas 45-vjeçari është futur në karburant ku ka grabitur xhiron ditore prej 120 mijë lekësh dhe më pas ka marrë një nga pompat e furnizimit me benzinë dhe ka kërcënuar se do i vinte flakën karburantit dhe vetes. Në këtë moment ka ndërhyrë në kohë policia, duke parandaluar dhe shmangur një ngjarje të rëndë kriminale me pasoja për jetën.