Pandemia në Shqipëri, VOA: Në shtator ra numri i viktimave, 64 % e viktimave u zbuluan nga ….

Në Shqipëri muaji shtator u mbyll me një numër më të ulët të viktimave nga COVID 19, gati 25 përqind më pak, ose 98 persona që kanë humbur jetën, kundrejt 129 vdekjeve të rregjistruara përgjatë muajit gusht.

Në total që nga fillimi i pandemisë, janë 388 qytetarë të cilët janë mundur nga Koronavirusi.

Sa i përket rasteve, ato kanë mbetur thuajse në të njejtin nivel me një muaj më parë, 4200 të prekur në shtator dhe 4210 të prekur në gusht, ndonëse, numri i testimeve arriti në 25404, ose rreth 14 përqind më shumë se përgjatë gushtit.

Këta dy muaj kanë rregjistruar dhe nivelin më të lartë të rasteve të konfirmuara. Ndërsa që nga muaji mars kur u shënuan rastet e para, e deri tani janë 13806 të infektuar, 64 përqind e të cilëve, janë zbuluar në gusht dhe shtator. Aktualisht në të gjithë vendin janë ende 5341 raste aktive.

Pavarësisht faktit se të infektuarit ishin në kuota gati të njejta, të shëruarit ishin më të shumtë në shtator (2636 persona rezultuan pozitivë ndaj dy testeve radhazi), ndërsa në gusht ishin rregjistruar 2480 të shëruar. Në total numri i tyre ka arritur në mbi 8 mijë.

Shifrat e 24 orëvë të fundit

Sipas të dhënave të publikuara nga Ministria e Shëndetësisë të enjten pasdite, në 24 orët e fundit është shënuar dhe numri më i lartë i të shëruarve brenda një dite, me 230 qytetarë të cilët nuk janë më pozitivë.

Megjithatë, 157 të tjerë janë konfirmuar të prekur nga Koronavirusi, ndërsa kuota e testimeve kaloi si asnjëherë më parë, mbi 1 mijë teste. Ministria bëri gjithashtu të ditur se një 66 vjeçar nga Kukësi, me sëmundje bashkëshoqëruese, ka humbur jetën.

Situata në dy spitalet që trajtojnë të sëmurët me shenja klinike, paraqitet me një numër të shtuar pacientësh, jo vetëm në total por dhe të atyre që janë në gjendje të rënduar. “Aktualisht në spitalin Infektiv dhe “Shefqet Ndroqi” po trajtohen 203 pacientë, 20 në terapi intensive nga të cilët vetëm 6 pacientë janë të intubuar”, bëri të ditur ministria e Shëndetësisë.

Që prej ditës së sotme restorantet dhe baret mund të funksionojnë dhe brenda mjedisve të mbyllura. Ministria e Shëndetësisë përsëriti se ato “duhet të funksionojnë vetëm sipas protokolleve të sigurisë, të cilat janë të detyrueshme për tu zbatuar nga çdo subjekt. Task-Forca e inspektimit të protokolleve anti-Covid, Policia e Shtetit dhe Policia Bashkiake do të inspektojnë zbatimin e protokolleve duke ndërmarrë masat sipas legjislacionit në fuqi, me qëllim mbrojtjen e shëndetit të qytetarëve”./VOA