Në New York u zhvillua Tryeza e Rrumbullakët Presidenciale dhe mbrëmja gala e organizuar nga “Project Legacy”, në kuadër të sesionit të 81-të të Asamblesë së Përgjithshme të Kombeve të Bashkuara. Aktiviteti bëri bashkë liderë ndërkombëtarë, diplomatë, përfaqësues të botës së biznesit dhe figura të njohura të shoqërisë civile.
Mes të ftuarve ishte edhe Zv. Presidenti i Hysenbelliu Group, Fatmir Hysenbelliu, i cili gjatë fjalës së tij e vendosi paqen, dialogun dhe bashkëpunimin ndërkombëtar në qendër të diskutimit. Hysenbelliu theksoi se ndërtimi i një paqeje të qëndrueshme nis nga brenda shoqërive, përmes liderëve që janë të gatshëm të dëgjojnë qytetarët, të ndërtojnë ura komunikimi dhe të respektojnë zërin e tyre. “Kjo paqe duhet të burojë pikësëpari nga liderë që gjejnë gjuhën, respektojnë dhe dëgjojnë popullin e tyre, si një kusht parësor për të arritur paqen edhe me vendet fqinje dhe miqtë ndërkombëtarë”, u shpreh ai.
Në një kohë kur zhvillimet në Inteligjencën Artificiale dhe transformimi i ekonomisë globale po marrin një vëmendje gjithnjë e më të madhe, Hysenbelliu nënvizoi nevojën që paqja dhe harmonia mes vendeve të mos humbasin nga prioritetet e agjendës ndërkombëtare. Sipas tij, dialogu mbetet një nga instrumentet më të rëndësishme për kapërcimin e ndarjeve dhe krijimin e marrëdhënieve më të qëndrueshme mes vendeve dhe komuniteteve.
Ai vuri gjithashtu theksin te bashkëpunimi ndërkombëtar dhe përdorimi i mekanizmave që nxisin komunikimin, duke i konsideruar ato si elementë të rëndësishëm për krijimin e kushteve të favorshme për zhvillim gjithëpërfshirës dhe për një cilësi më të mirë jete për komunitetet në mbarë botën. Mesazhi i përcjellë nga New York ishte i qartë: përtej teknologjisë, ekonomisë dhe sfidave globale, dialogu dhe paqja mbeten baza mbi të cilën mund të ndërtohet një e ardhme më e qëndrueshme.
