Partia e Lirisë, Blushi: Rama po çmonton industrinë për të betonizuar Shqipërinë

Sekretari i Përgjithshëm i Partisë së Lirisë, Tedi Blushi, akuzon qeverinë “Rama 4”, duke thënë se ka orientuar ekonominë shqiptare drejt ndërtimit, pasurive të paluajtshme, importeve dhe shërbimeve, në dëm të prodhimit vendas dhe industrisë.

Duke iu referuar të dhënave të Eurostat, Blushi deklaroi se prodhimi industrial në Shqipëri ka shënuar rënie të ndjeshme, nga 100 pikë në vitin 2021 në 84.7 pikë në vitin 2025. Sipas tij, kjo e rendit Shqipërinë ndër ekonomitë me performancën më të dobët në këtë sektor, ndërsa vende të tjera europiane kanë regjistruar rritje.

“Rama po çmonton industrinë për të betonizuar Shqipërinë”, u shpreh Blushi, duke kritikuar modelin ekonomik që, sipas tij, mbështetet gjithnjë e më shumë te kullat, resortet, pasuritë e paluajtshme, importet dhe turizmi.

Kritika pati edhe për sektorin bujqësor. Blushi pretendoi se që prej vitit 2017 numri i gjedhëve dhe të imtave është përgjysmuar, ndërsa rritja e importeve bujqësore ka shtuar varësinë e tregut shqiptar nga produktet e huaja.

Sipas tij, industria vendase po përballet njëkohësisht me forcimin e lekut, rritjen e kostove të punës dhe prodhimit dhe konkurrencën ndërkombëtare. Në këtë situatë, ai vlerësoi se rënia e eksporteve nuk mund të kompensohet vetëm nga turizmi.

Blushi kërkoi një ndryshim të modelit ekonomik, me më shumë mbështetje për prodhimin vendas, industrinë përpunuese, sektorin minerar, hidrokarburet dhe eksportet.

“Një kullë nuk është fabrikë. Një resort nuk është industri. Një import nuk është prodhim”, deklaroi ai.

Partia e Lirisë propozon që Shqipëria të kalojë nga një ekonomi e mbështetur te ndërtimi, shërbimet dhe importet drejt një modeli të orientuar te prodhimi, eksportet, teknologjia dhe krijimi i vendeve të punës.

Sipas Blushit, objektivi duhet të jetë një Shqipëri “prodhuese dhe eksportuese”, duke ndryshuar atë që Partia e Lirisë e konsideron modelin ekonomik të ndjekur gjatë qeverisjes së Edi Ramës.