Paskal Milo: Shpresoj që Rama të mos e dh… prapë
Kreu i Partisë Demokracia Sociale, Paskal Milo, është shprehur sërish i pakënaqur me Partinë Socialiste.
Ai thotë se kjo e fundit nuk po zbaton marrëveshjet e arritura me aleatët, si para zgjedhjeve të 2013-ës, ashtu edhe të zgjedhjeve të fundit vendore.
Milo thotë gjithashtu se partia e tij ka marrë vetëm dy drejtori fiktive, njëra prej të cilës ka vetëm tre punëtorë.
“Nga marrëveshja e parë na janë dhënë dy thërrime. Njëra është drejtori i Albminiera, një ndërmarrje që është duke u shkrirë dhe që nuk ka as të ardhura dhe as buxhet për të paguar punonjësit e saj. Na kanë dhënë gjithashtu një drejtor të INSIG në Shkodër, që ka tre vartës dhe është në process privatizimi”, thotë Milo për "Panorama".
Ai vijon më tej, duke u shprehur se tani nuk iu hapin telefonat. “Më shumë ka pasur heshtje, mbyllje telefonash, gjë që na ka ringjallur dyshimet e vjetra”, thotë ai.
Ndërsa duke folur për GSH, Milo shprehet: “Këtë herë do ishte e tepërt ta bënin për herë të dytë, sepse mendoj se një fjalë që kam përdorur kur nisëm negociatat për zgjedhjet vendore që deri në atë kohë e kishin (më fal për shprehjen) dhjerë, në marrëdhënie me ne, frazë që e kam përdorur në takimin zyrtar, nuk besoj se do e dhjesin për herë të dytë”.
