Pedagogët: Ja pse ka rënë Ligji i Arsimit

Ervin Goci është një prej  51 pedagogëve të Universitetit të Tiranës që nënshkruan peticionin për shfuqizimin e Ligjit për Arsimin e Lartë, Ai sqaron për Tv Klan se ky ligj ka probleme që në formulimin e tij e për rrjedhojë mbetet i pazbatueshëm.

Ervin Goci, pedagog në Departamentin e Gazetarisë: Ky ligj nuk është fare ligj, nuk është i shkruajtur si ligj, është më shumë një artificë, kërkon të respektojë një axhendë që nuk axhenda e universitetit. Njerëzit që janë përfshirë nuk kanë qenë njerëz të universitetit. E treta , ata që menaxhojnë nuk janë njerëz që zgjidhen nga universiteti.

Një ligj normal që nuk përcakton hierarkitë nuk mund të jetë ligj. Imagjino ta amendosh apo ta zbatosh.

Një ligj që nuk merr në konsideratë problemet që arsimi i kishte nuk bën tjetër veçse krijon probleme të reja. Ne kemi sot tarifa të larta, politizim të universitetit, burokratizim vertikal të universitetit, keqfinancim, universiteti është varfëruar, ky ligj nuk bën as transparencë, edhe për shkeljet që janë fare të hapura dhe nuk ka asnjë përgjigje.