Për herë të 4-tër, urgjenca e spitalit të Durrësit përfshihet nga flakët

Një zjarr ka përfshirë Spitalin e Durrësit. Situata ka shkaktuar panik, ndërkohë që stafi po përpiqet të transportojë pacientët e shtruar në urgjencë. Zjarrfikësja dhe policia kanë mbërritur dhe po punohet për venien e situatës në kontroll.

Zjarri thuhet se ka ndodhur për shkak të shpërthimit të një kabine elektrike në repartin e grafisë. Brenda pak minutash, zjarri ka pushtuar të gjitha dhomat dhe era e djegies së kabllove ka filluar të asfiksojë pacientët.

Kjo është hera e katërt që digjet ky spital. Më herët, në janar të këtij viti, një masë në kabinën elektrike prej ngarkesës në rrjet bëri që një zjarr i madh të përfshinte repartin e neurologjisë dhe më pas vijoi deri në katin e katërt për shkak të strukturës me një kolonë të spitalit.

Dy herët e tjera, spitali është djegur në vitin 2013 dhe në vitin 2015. Sërish shkak është bërë shpërthimi elektrik për nga mbingarkesa. Herën e parafundit, në janar të këtij viti, prokuroria nisi dhe hetimet duke parë herët e shumta që flakët përfshinin këtë godinë, por siç duket ende nuk ka gjetur ndonjë fajtor.