Përfaqësues të bashkisë Berat, homazhe në varrezat e dëshmorëve të atdheut

Për të përkujtuar heroizmin, mundin dhe sakrificat, gjakun e derdhur dhe veprën e lavdishme te heronjve të Luftës Antifashiste Nacionalçlirimtare, u zhvilluan sot homazhe ne varrezat e Deshmoreve te Atdheut. Në këtë ceremoni përkujtimore merrnin pjesë Prefekti i Qarkut Berat, Harilla Dafa, kryetari i bashkisë, Petrit Sinaj, kryetari i Këshillit të Qarkut, Fatlli Adilaj, kryetarja e Këshillit Bashkiak, Nikoleta Manka, përfaqësues të forcave politike, deputetë, prfaqësues të shoqatave atdhetare, të organizatave të veteranëve, të forumeve rinore, të familjeve të dëshmorëve, qytetarë etj.
Fjalën e rastit e mbajti kryetari i Organizatës së Familjeve të Dëshmorëve, Vullnet Zylyftari, i cili evokoi luftën e lavdishme të dëshmorëve të atdheut, ndaj të cilëve sot e përgjithmonë çdo gjeneratë duhet të përulet me nderim dhe respekt përballë veprës së luftëtarëve të lirisë, të cilët flijuan jetën e tyre për një Shqipëri të lirë e të pavarur.
Në emër të institucioneve vendore apo të shoqatave pjesëmarrëse, përfaqësuesit e tyre vendosën kurora me lule në memorialin kushtuar dëshmorëve të atdheut.
Për të vlerësuar e për t’i dhënë një vend të nderuar memories sonë historike, ngjarjeve, datave dhe personazheve të spikatur të historisë sonë, Bashkia e Beratit, me fondet e veta vendosi të rikonstruktojë Muzeun Historik të Sinjës. Është hera e parë që vëmendja e drejtuesve të pushtetit vendor fokusohet te çështja e muzeut historik, i cili pas viteve ’90, ka njohur vetëm humbje të vlerave, materialeve dhe gjithçkaje tjetër me vlerë muzeale.
Për ringritjen e këtij muzeu janë angazhuar specialistë të muzeumeve, të historiografisë, historian dhe punonjës të drejtorisë së kulturës, të cilët janë në fazën e dokumentimit, seleksionimit dhe depozistimit të materialeve historike, duke i ndarë ato sipas periudhave, datave dhe ngjarjeve, ku përfshihen përveç stendave, edhe objekte autentike, origjinale të protagonistëve të këtyre ngjarjeve, edhe dokumente e dorëshkrime origjinale, të cilat hedhin dritë mbi të vërtetat e ngjarjeve më të rëndësishme historike.
E gjithë kjo iniciativë ka gjetur mbështetjen e kryetarit të Bashkisë, Petrit Sinaj, i cili, duke vlerësuar rëndësinë e ngritjes së muzeut historik si një dëshmi e gjallë e memories sonë kolektive, ka ndjekur hapa pas hapi fazat e shqyrtimit, vlerësimit dhe miratimit të këtij projekti, i cili shumë shpejt do të jetë një ndër qendrat më të vizituara për të gjithë ata që duan të njohin gjurmët e së shkuarës sonë historike.