Përfundon rruga Korçë- Ersekë, Rama: Nxit turizmin në Kolonjë e Leskovik

Ka përfunduar ndërtimi i rrugës Korçë-Ersekë, një vepër e rëndësishme për infrastrukturën e vendit, por gjithashtu edhe një destinacion për turistët për shkak të pamjes panoramike që ofron.

Kryeministri Edi Rama ka publikuar pamjet nga aksi i përfunduar, i cili lidh dy bashkitë për 20 minuta, ndërsa shton se kjo rrugë do të krijojë kushte optimale për banorët si dhe për zhvillimin e mëtejshëm të turizmit, i cili ka nisur me hapa të shpejtë në Kolonjë e Leskovik, që deri dje ishin të izoluara.

“Ja edhe rruga e rilindur Korçë – Ersekë e përfunduar, si një aks i ri që i lidh dy bashkitë për 20 minuta dhe krijon kushte optimale transporti për banorët, prodhimet bujqësore po edhe nxitjen e mëtejshme të zhvillimit të turizmit që ka nisur me hapa të shpejtë edhe në Kolonjën e në Leskovikun e deri dje braktisur dhe izoluar krejtësisht.”- shkruan kryeministri Edi Rama.

Kreu i qeverisë pati një përgjigje edhe për akuzat e opozitës, pas shembjes së një pjese të aksit në shkurt të këtij viti, e cila sipas Ramës është rindërtuar me shpenzimet e bëra të gjitha nga firma.

“U vunë shumë kuje e hodh shumë baltë për një rrëshqitje të rrugës gjatë punimeve, e cila u rindërtuar me shpenzimet e bëra tërësisht nga firma. Qesh mirë kush qesh i fundit.”- shkruan kreu i qeverisë.

Aksi rrugor Korçë-Ersekë kishte një gjatësi prej 45 kilometrash, ndërsa distanca tashmë shkurtohet në 35 kilometra.

Ndërtimi i kësaj rruge nxit zhvillimin e mëtejshëm turistik të juglindjes së vendit duke afruar më pranë dy zona me mjaft potenciale, siç janë Korça dhe Erseka.