PISA 2025/ Rama: Nga fundi në krye, Shqipëria sot e para në matematikë

Kryeministri Edi Rama ka folur për rezultatet e Shqipërisë në testimin ndërkombëtar PISA 2025, gjatë episodit të sotëm të podcastit “Flasim”.

Rama e ka cilësuar rezultatin pozitiv si dëshmi të punës së bërë për përmirësimin e sistemit arsimor në vend. Sipas tij, ndryshimet janë rezultat i një procesi të gjatë dhe i përpjekjeve për të rritur cilësinë në arsim.

Kryeministri përmendi përmirësimet në infrastrukturën shkollore, tekstet mësimore, administrimin e institucioneve arsimore, si edhe forcimin e rolit të drejtuesve të shkollave përmes trajnimeve në Shkollën e Drejtorëve.

Rama vlerësoi gjithashtu kontributin e nxënësve dhe bashkëpunimin mes shkollës dhe prindërve, duke theksuar se rezultatet e PISA-s nuk janë vetëm meritë e një faktori të vetëm.

Ai tha se Shqipëria e ka nisur këtë proces nga nivelet më të ulëta, por sipas tij, falë përpjekjeve të vazhdueshme, vendi ka bërë një përparim të ndjeshëm dhe sot renditet në krye për matematikën.

“Shqipëria e filloi këtë ngjitje nga fundi, të fundit në distancë nga të tjerët dhe sot jemi të parët në matematikë”, u shpreh Rama.