Plas sherri në Shkodër, 40-vjeçari merr armën dhe qëllon ndaj bashkëfshatarit (EMRI)

Policia ka parandaluar një vrasje në Shkodër pas përshkallëzimit të një konflikti mes dy personave.

Mesditën e sotme në fshatin Bushat të Vaut të Dejës, ka ndodhur një konflikt mes dy shtetasve, ku më pas njëri nga personat e përfshirë, ka qëlluar me armë gjahu në drejtim të automjetit me të cilin po largohej shtetasi tjetër.

Shërbimet e Policisë, pas marrjes së njoftimit, kanë shkuar menjëherë në vendngjarje, ku falë veprimeve të shpejta operacionale, është bërë e mundur kapja dhe arrestimi në flagrancë i shtetasit: Zefjan Çuni, 40 vjeç, banues në fshatin Bushat. U gjet e u sekuestrua arma e gjahut e përdorur nga ky shtetas.

I lartpërmenduri, si pasojë e një konflikti për motive të dobëta, ka qëlluar me armë gjahu në drejtim të automjetit që drejtohej nga  shtetasi Z. Ll. 40 vjeç, por pa shkaktuar pasoja.

Materialet u referuan në Prokurorinë e Rrethit Gjyqësor Shkodër, për veprime të mëtejshme.